కోటిపల్లి గ్రామం / KOTIPALLI VILLAGE

శ్రీ పార్వతీ సమేత కోటేశ్వర స్వామి

కుంభ రాశి, శతభిషం నక్షత్రం (2వ పాదం)

పాద శివలింగ స్ధానం: చాళుక్యుల భీమ మండలం నందలి ద్రాక్షారామ క్షేత్రానికి దక్షిణ దిశగా, సుమారు 11 kms. దూరాన, కోటిపల్లి (Kotipalli) గ్రామం కలదు. పావన గౌతమీ నదీ తీరాన శ్రీ ఛాయ సోమేశ్వర స్వామి ఆలయం ఉంది. ఆలయ ప్రాంగణములో శ్రీ పార్వతీ సమేత కోటేశ్వర స్వామికి ఒక ప్రత్యేక స్ధానం ఉంది. భీమసభ నందలి 108 శివ లింగాలలో కోటేశ్వర లింగము ఒకటిగా పేర్కొనారు.

స్ధల పురాణం: కోటిపల్లి క్షేత్రం నందలి పవిత్ర స్నానం, దైవ దర్శనం, పితృ కర్మలు, తీర్ధ దానాలు వలన కోటి రెట్లు ఫలం లభ్యమవుతుంది అని శాస్త్రములు తెల్పుచున్నావి. కోటి కన్యాదానాల ఫలం, నూరు అశ్వమేధయాగాల ఫలం, కోటి శివలింగాలు ప్రతిష్ఠ చేసిన పుణ్యఫలాన్ని ఇస్తుంది అని మన ఆర్యులు చెప్పుచుంటారు. కోటి కన్యాదానాల ఫలం, నూరు అశ్వమేధయాగాల ఫలం, కోటి శివలింగాలు ప్రతిష్ఠ చేసిన పుణ్యఫలాన్ని ఇస్తుంది అని మన ఆర్యులు చెప్పుచుంటారు. శ్రీమన్నారాయణుడు ఆజ్ఞ అనుసరించి చంద్రుడు (సోముడు) తన శాపవిమోచన కోసం ఒక శివలింగాన్ని ప్రతిష్టించి, ఆరాదించినాడు. ఆ శివ లింగము ఛాయ సోమేశ్వర లింగముగా పిలువబడుచున్నాది.

శ్రీ కోటేశ్వర లింగ వృత్తాంతము: అహల్య భర్తయైన గౌతముడు ఉదయాన్నే నదీ స్నానానికి వెళ్ళగా ఆమె మీద కోరికతో దేవేంద్రుడు ఆమె భర్త రూపంలో వచ్చి కోరిక తీర్చమని అడుగుతాడు. ఇంద్రుడి మోసం తెలియక అహల్య అందుకు అంగీకరిస్తుంది. అదే సమయానికి గౌతముడు తిరిగివచ్చి, ఆమెని శపిస్తాడు. “ ఇహవర్ష సహస్రాణి బాహూని నిసిశ్యసి.వాయు భక్ష్యా నిరాహారా తప్యాని భస్మశాయినీ. అదృశ్య సర్వ భూతానాంఆశ్రమే అస్మిన్ నివసిష్యసి”. అని శాపం ఇస్తాడు. బహు సంవత్సరాలు నీవు గాలిని భక్షిస్తూ ఆహారము లేక తపస్సు చేసుకుందువు. నీపైన పరాగము(బూడిద) కప్పబడుతుంది. నీవెవరికీ కనబడవు. అదృశ్య రూపమున ఇక్కడనే తపస్సు చేసికొనుము అని అర్ధం. త్రేతా యుగంలో మహా విష్ణువు రాముని అవతారమెత్తి ఆయన పాదధూళిచే నీకు శాపవిమోచనం అవుతుందని తెలియబరుస్తాడు.

ఇంద్రుణ్ణి తన శరీరమంతా స్త్రీ జననేంద్రియాలతో నిండిపోయేలాగా శపిస్తాడు. వృషణాలు నేలరాలి పోయేటట్లు చేస్తాడు. కానీ ఇంద్రుడు ఇతర దేవతల సాయంతో ఒక జీవాన్ని బలి ఇచ్చి దాని వృషణాలను అతికించేటట్లు చేస్తాడు. అమ్మవారిని గురించి తపస్సు చేసి తన శరీరంపై ఉన్న స్త్రీ జననేంద్రియాలను కన్నులులాగా కనిపించేటట్లు వరం పొందుతాడు. అందుకనే ఆయన్ను సహస్రాక్షుడు అని కూడా వ్యవహరిస్తారు. ఇంద్రుడు తన పాప ప్రక్షాళన కోసం కోటేశ్వర లింగాన్ని ప్రతిష్టించి, కోటి నదీ ధారలతో అభిషేకించి శాప విముక్తి పొందినాడు. ఆ లింగము శ్రీ కోటేశ్వర లింగముగా ప్రసిద్ధి చెందినది.

ఆలయం: శ్రీ రాజరాజేశ్వరీ సమేత సోమేశ్వరాలయం తూర్పు అభిముఖముగా ఉంటుంది. ప్రధానాలయం నందు శ్రీ ఛాయ సోమేశ్వర లింగము, శ్రీ రాజరాజేశ్వరీ అమ్మ వారు, శ్రీ సిద్ధి జనార్దన స్వామి, శ్రీ కోటేశ్వర లింగము మరియు నందీశ్వరుడు ఉంటారు. ఆలయ సమూహం విశాలముగా ఉంటుంది. ఆలయ ప్రాంగణములో నవగ్రహములు, శ్రీ చంద్రమౌళేశ్వర స్వామి, ఆది శంకరాచార్యులు, కాలభైరవ స్వామి, పార్వతీ దేవి, మృత్యుంజయ మూర్తిని దర్శించగలము. ఆలయ ప్రవేశ ద్వారము, ఆలయ శిఖరం, ధ్వజస్ధంభము కేవలం ఒకటి మాత్రమే ఉంటుంది. ఆలయ శిఖరం పైన పూర్ణ కలశం ఉంటుంది. ఉత్సవాలు కూడ శివ-కేశవులకు కలసి ఒకటిగానే ఉంటాయి. మహాశివరాత్రికి అంగరంగ వైభవముగా ఉత్సవాలు జరుగుతాయి. వైశాఖ శుద్ధ ద్వాదశి (క్షీరాబ్ధి ద్వాదశి) నాడు ఆలయ పుష్కరిణిలో (సోమ తీర్ధం) ఒకే వేదికపై తెప్పోత్సవం నిర్వహించుతారు.

భక్తులు పావన గోదావరి పుణ్యతీర్థంలో స్నానమాచరించి, ఆలయ ప్రదక్షిణ తర్వాత కోటేశ్వర స్వామిని, తదుపరి శ్రీ సోమేశ్వర స్వామిని, అనంతరం శ్రీ దేవి - భూదేవి సమేత సిద్ధి జనార్దన స్వామిని దర్శించుకుని పిమ్మట శ్రీ రాజరాజేశ్వరీ అమ్మవారిని దర్శించుకోవడం ఆలయ ఆచారంగా వస్తోంది. ప్రధానాలయం నందు అంతరాలయాలు, గర్భాలయాలు వేరు వేరుగా ఉంటాయి. శ్రీ కోటేశ్వర లింగము ప్రధానాలయం వెనుక వైపున ఉంటుంది. ఇది కూడ ప్రధానాలయంలో ఒక భాగము. అమ్మవారిని పార్వతీ దేవిగా కొలుస్తారు.

శ్రీ పార్వతీ సమేత కోటేశ్వర స్వామికి ప్రతి నిత్యం అర్చనలు, అభిషేకాలు జరుగుతాయి. వైశాఖ శుద్ధ ఏకాదశి నాడు శివ-కేశవులకు ఏక కాలములో కళ్యాణ ఉత్సవాలు నిర్వహించుతారు. మహా శివరాత్రి సందర్భముగా విశేష అభిషేకాలు జరుగుతాయి. సాయంత్ర కోటి దీపోత్సవం ఉంటుంది. ఆలయం నందు కార్తీక మాసంలో విశేష పూజలు జరుగుతాయి. శరన్నవరాత్రులు విశేషముగా ఉంటుయి. ఆలయ సేవలు కోసం అర్చక స్వామి గారిని సంప్రదించగలరు.

శ్రీ కోటేశ్వర లింగము, శతభిషం (2వ పాదం) లింగము చెందినది. శతభిషం (2వ పాదం) నందు జన్మంచిన శిశువు దోషం నకు ఉపశమనం (ఊరట) కొరకు అభిషేక శాంతులు నిర్వహించుతారు.

రవాణా సమాచారం: కాకినాడ - కోటిపల్లి బస్సులు (Via) గొల్లపాలెం, ద్రాక్షారామం, కె.గంగవరం మీదగా ప్రతి గంటకు ఉంటాయి.

* కాకినాడ నుంచి ద్రాక్షారామం నకు షేరింగ్ ఆటోలు దొరుకుతాయి. కాకినాడ పాత బస్ స్టాండ్ మరియు కాకినాడ జగన్నాధపురం బ్రిడ్జి నుంచి ద్రాక్షారామం నకు షేరింగ్ ఆటోలు దొరుకుతాయి.

* ద్రాక్షారామం నుంచి కోటిపల్లి కు షేరింగ్ ఆటోలు దొరుకుతాయి.

రవాణా సమాచారం: రాజమండ్రి - కోటిపల్లి బస్సులు (Via) రామచంద్రాపురం, ద్రాక్షారామం, కె.గంగవరం మీదగా ప్రతి గంటకు ఉంటాయి. ప్రయాణికుల అభ్యర్ధన బట్టి బస్సులు ఆలయం కోనేరు వద్ద ఆగుతాయి. ఆలయం నకు సుమారు 200 meters దూరంలో కోటిపల్లి రేవు ఉంటుంది. కోటిపల్లి రేవుకు ఒక వైపు Boat సౌకర్యం మరో వైపు స్ధానిక బస్ స్టాండ్ & ఆటో స్టాండు ఉంటాయి.

అర్చక స్వామి: శ్రీ పార్వతీ సమేత కోటేశ్వర స్వామి వంశపారంపర్య అర్చక స్వామి. శ్రీ శివకోటి బాలసుబ్రహ్మణ్యం (బాలు) సెల్: 94903 51195.

విజ్ఞప్తి: ద్రాక్షారామ - శ్రీ భీమేశ్వరాలయం యొక్క ఉత్తర ముఖద్వారం వద్ద శ్రీ రాజ రాజేశ్వరి పీఠం వారి నిత్యాన్నదానం సత్రం కలదు.దూర ప్రాంతములు నుంచి ఆలయాలు సందర్శనకు వచ్చిన యాత్రికులకు ఉచ్చిత అన్న ప్రసాదములు వితరణ జరుగును. భక్తులు ముందుగా అన్నప్రాసాదం కోసం ఫోనులో సంప్రాదించాలి.

వీరి Cell 83320 29544.

వీరు వాహనములు కూడ ఏర్పాటు చేస్తారు.